សហសាល B នៃសាកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច នៅព្រឹកថ្ងៃទី២១ ខែតុលានេះ ពេញទៅដោយសាស្រ្តាចារ្យនិងនិស្សិតច្បាប់ប្រមាណ៤០០នាក់ ដែលមកស្តាប់បទឧទេ្ទសនាមរបស់ឯកឧត្តមប្រធានស្តីទីនិងលោកអនុប្រធានការិយាល័យរដ្ឋបាលនៃអង្គជំនុំជម្រះ វិសាមញ្ញក្នុងតុលាការកម្ពុជា។
ឯកឧត្តម ក្រាញ់ តូនី ប្រធានស្តីទី និងលោក ឃ្នុត រ៉ូសិនហក អនុប្រធាន ការិយាល័យរដ្ឋបាលនៃ អ.វ.ត.ក. បានផ្តល់បទឧទ្ទេសនាម ស្តីអំពី “ការវិវឌ្ឍន៍ថ្មីៗនៃ អ.វ.ត.ក. និងមេរៀនទាំងឡាយដែល និស្សិតច្បាប់អាចរៀនសូត្រពីដំណើរការនេះ” ដល់សាស្រ្តាចារ្យនិងនិស្សិតប្រមាណ៤០០នាក់ និងនាំយកសៀវភៅសាលក្រម ឌុច ពេញលេញចំនួន៣៦០ច្បាប់ និងសង្ខេបចំនួន៤៥០ច្បាប់ ភាសាបារាំង១០ច្បាប់ ភាសាអង់គ្លេស១០ច្បាប់ ទៅប្រគល់ជូនតាមសំណូមពររបស់និស្សិតនិងសាស្រ្តាចារ្យនៃសាកលវិទ្យាល័យ ភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច ដែលមានបំណងចង់ស្វែងយល់ឲ្យបានប្រសើរទៅលើរឿងក្តី លេខ០០១ និងទៅលើដំណើរការនីតិវិធីនៅ អ.វ.ត.ក.។
មានប្រសាសន៍ស្វាគមន៍ក្នុងឧិកាសនោះ ឯកឧត្តម យក់ ង៉ុយ សាកលវិទ្យាធិការនៃសាកលវិទ្យាល័យ ភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច បានវាយតម្លៃខ្ពស់ចំពោះថ្នាក់ដឹកនាំនៃ អ.វ.ត.ក. ដែលបាន ចំណាយពេលវេលាដ៏មានតម្លៃនាំយកបទពិសោធន៍ពី អ.វ.ត.ក. មកចែករំលែកដល់និស្សិតច្បាប់ដែល កំពុងសិក្សា និងដែលនឹងក្លាយជាអនាគតអ្នកច្បាប់នៅព្រះរាជាណាចក្រកម្ពុជា។ ឯកឧត្តមចាត់ទុក ជោគជ័យរបស់ អ.វ.ត.ក. ក្នុងសំណុំរឿង០០១ ជានិមិត្តរូបនៃការរីកចម្រើនថ្មីមួយទៀតនៅក្នុងប្រព័ន្ធ យុត្តិធម៌កម្ពុជា ដែលកំណែទម្រង់នេះជាទិសដៅអាទិភាពមួយរបស់រាជរដ្ឋាភិបាលកម្ពុជា ព្រោះថា យុត្តិធម៌ជាឬសគល់នៃសន្តិភាពសង្គម។ ឯកឧត្តមលើកទឹកចិត្តនិស្សិតទាំងអស់ឲ្យខិតខំយកចិត្តទុកដាក់ អាននិងស្វែងយល់អំពីសាលក្រមនេះ និងទាញយកអត្ថប្រយោជន៍ពីឯកសារនេះមកប្រើប្រាស់នៅក្នុង ការសិក្សា។
ឯកឧត្តម ក្រាញ់ តូនី ប្រធានស្តីទីនៃ អ.វ.ត.ក. បានជម្រាបជូននិស្សិតអំពីដំណើរការវិវឌ្ឍន៍នៃសំណុំ រឿងលេខ ០០១ និង ០០២។ សម្រាប់សំណុំរឿងលេខ០០១ គ្រប់ភាគីដែលពាក់ព័ន្ធបានដាក់ពាក្យ បណ្តឹងឧទ្ធរណ៍ទៅអង្គជំនុំជម្រះតុលាការកំពូលជាបន្តបន្ទាប់។ ដោយឡែក សហព្រះរាជអាជ្ញាបានស្នើ សុំឲ្យតុលាការកំពូលពិចារណាផ្តន្ទាទោស ឌុច ឲ្យដល់ដំណាក់កាលអស់មួយជីវិត ប៉ុន្តែសូមឲ្យកាត់ បន្ថយមកនៅត្រឹម ៤៥ឆ្នាំ ដើម្បីជាដំណោះស្រាយសមស្របចំពោះការឃុំខ្លួនគាត់ខុសនីតិវិធីច្បាប់ មុនពេលមានការឃុំខ្លួននៅ អ.វ.ត.ក.។ សម្រាប់សំណុំរឿងលេខ ០០២ ការិយាល័យសហចៅក្រម ស៊ើបអង្កេតបានចេញសេចក្តីសន្និដ្ឋានចុងក្រោយនិងបញ្ជូនជនត្រូវចោទបួនរូប មាន ខៀវ សំផន, នួន ជា, អៀង សារី, និង អៀង ធិរិទ្ធ ទៅជំនុំជម្រះក្តី ហើយគេសង្ឃឹមថា សវនាការជាសាធារណៈនឹងត្រូវបើក នៅឆមាសទី១ឆ្នាំក្រោយ។
ឯកឧត្តមក៏បានលើកឡើងអំពីភាពសុក្រិត្យនៃ អ.វ.ត.ក. ដែលខុសប្លែកពីតុលាការព្រហ្មទណ្ឌអន្តរជាតិ នៅប្រទេសដទៃទៀតដែលបានបង្កើតឡើងពីពេលមុនៗ។ ឯកឧត្តមសង្កត់ធ្ងន់ថា “ជោគជ័យរបស់ អ.វ.ត.ក. បញ្ជាក់អំពីភាពចាស់ទុំរបស់សង្គមកម្ពុជាដែលមានលទ្ធភាពក្នុងការដោះស្រាយជាមួយ អតីតកាលដ៏ខ្មៅងងឹតរបស់ខ្លួនក្នុងការស្វែងរកយុត្តិធម៌និងការពិតដើម្បីឈានដល់ការអភិវឌ្ឍន៍ជាតិ។ ការងារនេះរួមចំណែកដោយផ្ទាល់ដល់ការពង្រឹងប្រព័ន្ធយុត្តិធម៌ជាតិក្នុងក្របខ័ណ្ឌសន្តិភាពនិងការ បង្រួបបង្រួមជាតិ”។
ឯកឧត្តម ក្រាញ់ តូនី ក៏បានសម្តែងសេចក្តីសង្ឃឹមយ៉ាងមុតមាំថា និស្សិតដែលមានវត្តមាននៅក្នុងថ្ងៃនេះ នឹងយកសៀវភៅសាលក្រមនេះទៅសិក្សាស្វែងយល់ ធ្វើការប្រៀបធៀប និងប្រើប្រាស់ចំណេះទាំងនោះ នៅក្នុងការសិក្សា ក៏ដូចជាក្នុងការប្រកបមុខរបរវិជ្ជាជីវៈនាថ្ងៃអនាគត។ ឯកឧត្តមក៏មិនភ្លេចអញ្ជើញ សាស្រ្តាចារ្យនិងនិស្សិតផ្នែកច្បាប់នៃសាកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ចចូលរួមតាមដានសវនាការនៅក្នុងសំណុំរឿង ០០២ ជាបន្តបន្ទាប់។
បន្ថែមទៅលើប្រសាសន៍របស់ឯកឧត្តមប្រធានស្តីទី លោក ឃ្នុត រ៉ូសិនហក ជាអនុប្រធានរដ្ឋបាល បានជម្រាប់ជូននិស្សិតអំពីថា “តើនិស្សិតអាចយល់ដឹងនិងដកស្រង់បទពិសោធន៍អ្វីខ្លះពីដំណើរការរបស់ អ.វ.ត.ក.”។ លោក រ៉ូសិនហក បានលើកឡើងអំពីចំណុចសំខាន់មួយចំនួនដែលនិស្សិតអាចរៀនសូត្របាន ពីសាលក្រម ឌុច។ ទីមួយ និស្សិតអាចរៀនសូត្រអំពីយុទ្ធវិធីនៃការពិភាក្សាដេញដោលនៅក្នុងដំណើរការ រឿងក្តី មានដូចជា ឯកសារអ្វីខ្លះដែលត្រូវយកមកប្រើជាសំអាងក្នុងការជជែកវែកញែក តើត្រូវធ្វើដូចម្តេច ដើម្បីឲ្យការវែកញែកមានទម្ងន់ តើមានឯកសារអ្វីខ្លះដែលអាចប្រើជាជំនួយក្នុងការបកស្រាយច្បាប់ ជាដើម។ ទី២ តាមរយៈសៀវភៅសាលក្រម ឌុច និស្សិតអាចស្វែងយល់អំពីការសរសេរអត្ថបទច្បាប់ ដែលមានលក្ខណៈខុសពីការសរសេរអត្ថបទព័ត៌មានសម្រាប់ប្រព័ន្ធផ្សព្វផ្សាយ។ ទី៣ និស្សិតអាចរៀន សូត្រអំពីការលើកឡើងនូវអង្គហេតុនិងអង្គសេចក្តីនៅក្នុងតុលាការ។ និងទី៤ និស្សិតអាចស្វែងយល់អំពី យុត្តិសាស្រ្តនិងយុត្តាធិការរបស់តុលាការនៅក្នុងដំណោះស្រាយឧក្រិដ្ឋកម្ម។
លោករ៉ូសិនហក ក៏បានបញ្ជូនសារដ៏សំខាន់មួយដល់និស្សិតច្បាប់ទាំងអស់ថា “ខ្ញុំសូមឲ្យអ្នកទាំងអស់គ្នា អានច្បាប់ទាំងអម្បាលម៉ាន ឲ្យបានច្រើនដើម្បីអាចយល់ច្បាស់អំពីច្បាប់។ អ្នកទាំងអស់គ្នាជាអនាគត អ្នកច្បាប់ និងជាអ្នកអនុវត្តកំណែទម្រង់ប្រព័ន្ធយុត្តិធម៌នៅប្រទេសកម្ពុជា។ ខ្ញុំសូមឲ្យអ្នកទាំងអស់គ្នាពុំ គ្រាន់តែអានសាលក្រមនេះប៉ុណ្ណោះទេ ប៉ុន្តែចំណាយពេលវេលាស្វែងយល់ឲ្យបានច្បាស់នូវចំណុចនីមួយៗ និងមិនត្រូវរំលងចោលឃ្លាឃ្លោងណាមួយឲ្យសោះប្រសិនបើអ្នកមិនទាន់យល់ចំណុចនោះច្បាស់ទេ”។
នេះពុំមែនជាលើកទីមួយទេដែលប្រធានទាំងពីររូបនៃការិយាល័យរដ្ឋបាលនៃ អ.វ.ត.ក. អញ្ជើញផ្តល់ បទឧទ្ទេសនាមនិងប្រគល់សៀវភៅសាលក្រម ឌុច។ អ.វ.ត.ក. បានរៀបចំពិធីបែនេះនៅស្ថាប័នមួយ ចំនួនពីមុនមក ដូចជា សាលាភូមិន្ទរដ្ឋបាល ទីស្តីការគណៈ រដ្ឋមន្រ្តី តុលាការដំបូងរាជធានីភ្នំពេញ តុលាការដំបូងខេត្តកណ្តាល។ ការផ្តល់បទឧទ្ទសនាមលើកនេះគឺមានសារសំខាន់យ៉ាងក្រៃលែង ព្រោះសាកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ចគឺជាស្ថាប័នដែលបណ្តុះបណ្តាលធនធាន មនុស្សសម្រាប់បម្រើក្នុងវិស័យច្បាប់ ហើយនិស្សិតច្បាប់ទាំងនេះគឺជាអនាគតនៃអ្នកអនុវត្តនូវ គោលនយោបាយកំណែទម្រង់ប្រព័ន្ធយុត្តិធម៌ តាមយុទ្ធសាស្រ្តអភិវឌ្ឍន៍សង្គមជាតិរបស់រាជរដ្ឋាភិបាលកម្ពុជា។
ថ្នាក់ដឹកនាំនៃ អ.វ.ត.ក. នឹងចូលរួមក្នុងពិធីផ្តល់បទឧទ្ទេសនាមនិងប្រគល់សៀវភៅនៅស្ថាប័នសំខាន់ៗ មួយចំនួនទៀតនៅពេលខាងមុខ ដូចជា ព្រឹទ្ធសភា គណៈមេធាវី និងក្រសួងយុត្តិធម៌៕
សូមទាញយក អត្ថបទនេះជា PDF