គណៈគ្រប់គ្រងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) កាលពីថ្ងៃទី២៨ ខែកុម្ភៈ ឆ្នាំ២០២៤ ទទួលស្វាគមន៍ដំណើរទស្សនកិច្ចរបស់គណៈប្រតិភូអង្គការ g7+ ដែលជាអង្គការអន្តររដ្ឋាភិបាលបង្កើតឡើងដោយប្រទេសដែលរងផលប៉ះពាល់ដោយជម្លោះ នៃប្រទេសទីម័រខាងកើត មកកាន់ការិយាល័យ អ.វ.ត.ក.។ គណៈប្រតិភូអង្គការអន្តររដ្ឋាភិបាល g7+ នៃប្រទេសទីម័រខាងកើតនេះ មានលោក Felix Piedade នាយកប្រតិបត្តិ និង លោក Agostinho Travares អ្នកវិភាគផ្នែកគោលនយោបាយ។ ក្នុងអំឡុងកិច្ចប្រជុំ ឯកឧត្តម ក្រាញ់ តូនី ប្រធានរដ្ឋបាលស្តីទី អ.វ.ត.ក. លោក ឃ្នុត រ៉ូហ្សិនហ៊ក អនុប្រធានការិយាល័យរដ្ឋបាល ឯកឧត្តម ថោង សុជាតិ មន្ដ្រីគ្រប់គ្រងជាន់ខ្ពស់ នៃ អ.វ.ត.ក. បានជម្រាបជូន និងធ្វើបទបង្ហាញដល់គណៈប្រតិភូអំពីសមិទ្ធិផល កេរដំណែល និង ការងាររបស់ អ.វ.ត.ក. ក្នុងដំណាក់កាលមុខងារសេសសល់។
