គរុនិស្សិត និងនិស្សិតប្រមាណ២០០នាក់ មកពីមជ្ឈមណ្ឌលបណ្ដុះបណ្ដាលគរុកោសល្យរាជធានីភ្នំេពញ និងសាកលវិទ្យាល័យភូមិន្ទភ្នំពេញ បានចូលរួមក្នុងកម្មវិធីទស្សនកិច្ចសិក្សារបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ក្រោមការសម្របសម្រួលពីកម្មវិធីសច្ចធម៌ប្រវត្តិសាស្ដ្រ របស់សហភាពសហព័ន្ធយុវជនកម្ពុជារាជធានីធានីភ្នំពេញ។ កម្មវិធីទស្សនកិច្ចសិក្សានេះត្រូវបានរៀបចំឡើងនៅថ្ងៃទី១៧ ខែមករា ឆ្នាំ២០២៤ ក្នុងគោលបំណងឱ្យនិស្សិតទាំងអស់ស្វែងយល់ឱ្យច្បាស់អំពីប្រវត្តិសាស្ដ្ររបស់កម្ពុជា កេរដំណែលនៃជំនុំជម្រះក្ដីក្នុងសាលាក្ដីខ្មែរក្រហម និងគុណតម្លៃនៃសន្ដិភាព។
គរុនិស្សិត និងនិស្សិតដែលចូលរួមក្នុងកម្មវិធីនេះ ត្រូវបាននាំយកទៅទស្សនកិច្ចសិក្សានៅវិមាន ឈ្នះ-ឈ្នះ និងស្វែងយល់អំពីការប្រព្រឹត្តទៅនៃ អ.វ.ត.ក. និងគុណតម្លៃនៃសន្ដិភាព នៅក្នុងការិយាល័យសហភាពសហព័ន្ធយុវជនកម្ពុជារាជធានីភ្នំពេញ។
ក្នុងដំណើរទស្សនកិច្ចសិក្សានៅវិមានឈ្នះ-ឈ្នះ និស្សិតទាំងអស់ត្រូវបានទទួលស្វាគមន៍យ៉ាងកក់ក្ដៅ និងបទបង្ហាញពីមគ្គុទ្ទេសក៏វិមាន ឈ្នះ-ឈ្នះ អំពីរចនាបថ និងខ្លឹមសារនៃសំណង់ដ៏ធំស្កឹមស្កៃរបស់វិមាន ឈ្នះ-ឈ្នះ ប្រវត្តិនៃការតស៊ូរបស់ឥស្សរជនកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍ និងការដាក់ចេញគោលនយោបាយ ឈ្នះ-ឈ្នះ ដើម្បីឆ្ពោះទៅការបញ្ចប់សង្គ្រាមទាំងស្រុងក្នុងប្រទេសកម្ពុជា។
បន្ទាប់ពីបញ្ចប់ទស្សនកិច្ចនៅវិមាន ឈ្នះ-ឈ្នះ និស្សិតទាំងអស់បានបន្ដដំណើរទៅការិយាយល័យរបស់សហភាពសហព័ន្ធយុវជនកម្ពុជារាជធានីភ្នំពេញ ដើម្បីស្ដាប់បទបង្ហាញពីតំណាង អ.វ.ត.ក. ទាក់ទងនឹងដំណើរការចចារក្នុងការបង្កើតសាលាក្ដីខ្មែរក្រហម ការប្រព្រឹត្តទៅនៃការជំនុំជម្រះក្ដី ការអនុវត្តមុខងារសេសសល់ក្រោយពេលការជំនុំជម្រះក្ដីត្រូវបានបញ្ចប់ និងសារៈសំខាន់នៃកេរដំណែលពីការជំនុំជម្រះក្ដីលើអតីតមេដឹកនាំជាន់ខ្ពស់របបខ្មែរក្រហម។ នៅទីនោះ និស្សិតទាំងអស់ក៏បានស្ដាប់បទបង្ហាញពីវាគ្មិនកិត្តិយសមកពីរាជបណ្ឌិសភាកម្ពុជា អំពីប្រវត្តិសាស្ដ្ររបស់ប្រទេសកម្ពុជា ដំណើរការកសាងសន្ដិភាព និងតម្លៃនៃសន្ដិភាពសម្រាប់មនុស្សជាតិ។
សូមបញ្ជាក់ថា កម្មវិធីទស្សនកិច្ចសិក្សានេះ ជាផ្នែកមួយនៃការអនុវត្តមុខងារសេសសល់របស់អង្គជំនុំជម្រះ ដែលត្រូវបានតម្រូវឱ្យធ្វើការផ្សព្វផ្សាយដល់សាធារណៈជនទូទៅអំពីការងារ និងកេរដំណែលរបស់ អ.វ.ត.ក. បន្ទាប់ពីនីតិវិធីនៅក្នុងប្រព័ន្ធតុលាការត្រូវបានបញ្ចប់។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៤ នេះ មានសាធារណៈជនជាតិ និងអន្តរជាតិ ជាង ៦៥ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
